Русија повлече дел од трупите од украинската граница, Киев објави крај на ескалацијата

Русија соопшти дека повлекла дел од трупите кои учествувале во воените вежби на границата со Украина и ги вратила во касарните, во потег кој се толкува како прв чекор кон можна деескалација на кризата во регионот.

Руското Министерство за одбрана во вторникот соопшти дека иако воените вежби на границата продолжуваат, дел од војниците во јужното и западното крило го завршиле своето учество и почнале да се враќаат во касарните. 

Ваквиот развој е спротивен на предупредувањата од САД и Велика Британија кои очекуваат Русија да ја нападне Украина во секој момент. 

Британската министерка за надворешни работи Лис Трус вели дека сака да види целосно повлекување на руските трупи од границата за да поверува дека Москва не планира инвазија.  

Видео снимки на руското министерство за одбрана покажуваат тенкови и други оклопни возила кои се товарат на специјални железнички вагони. 

Киев: Спречена ескалација 

Русија ангажираше над 100.000 војници во близина на границата со Украина, како и дополнителни сили кои учествуваат на заеднички воени вежби во Белорусија, со што Украина е речиси целосно заобиколена од руската војска. 

Москва досега отфрлаше дека планира да ја нападне Украина, но бара гаранции од САД и НАТО дека Киев нема да му се приклучи на воениот блок. Вашингтон и Брисел досега одбиваа да дадат такви гаранции.  

Украинските власти денеска соопштија дека заедничките напори со западните сојузници спречиле руска инвазија.

„Ние и нашите сојузници успеавме да ја спречиме Русија од понатамошна ескалација. Веќе е средина на февруари и гледате дека дипломатијата функционира“, изјави украинскиот министер за надворешни работи Дмитро Кулеба. 

Шефот на европската дипломатија Жозеп Борел порача дека ЕУ е подготвена да разговара за руските безбедносни грижи.

извор: dw.com.mk

Total
1
Shares
Поврзани објави
Повеќе

Роман Абрамович отруен

Портпарол на рускиот милијардер Роман Абрамович потврди за неговата влошената здравствена состојба откако наводно бил затруен за време…