Според уставот, премиерот Хан Дак-су, назначен од Јун, станува вршител на должноста претседател. Јун е вториот конзервативен претседател кој е отповикан во Јужна Кореја. Парк Геун-хе беше отстранета од функцијата во 2017 година.
Одлуката дојде откако некои членови на Партијата на народната моќ на Јун им се приклучија на опозициските партии, кои контролираат 192 места во 300-членото Национално собрание, со што го пробија прагот од две третини потребни за импичмент. Отповикувањето го поддржаа 204 пратеници, 85 беа против, тројца воздржани, со осум неважечки ливчиња.
Иако е суспендиран, Јун останува на должност. Уставниот суд ќе одлучи дали ќе го смени во следните шест месеци. Ако Јун биде сменет од функцијата, ќе бидат распишани предвремени избори.
Драматичната одлука е кулминација на изненадувачкиот политички конфликт што започна кога Јун на 3 декември накратко прогласи воена состојба и испрати војници во парламентот. Потегот на Јун заврши со катастрофа, поради што многумина побараа негово отпуштање.
Опозициските партии се обидоа да го отповикаат пред една недела, но Јун го преживеа гласањето тогаш бидејќи членовите на неговата владејачка партија Народна моќ го бојкотираа гласањето, надевајќи се дека претседателот сам ќе поднесе оставка. Но, Јун реши да заземе уште поостра линија, држејќи пркосен говор во четвртокот во кој ја бранеше одлуката за воена состојба, ја критикуваше опозицијата, тврдеше дека се обидува да ја „спаси земјата“ и вети дека ќе „се бори до последен момент со луѓето“.
Но, непосредно пред тој говор, лидерот на неговата партија ја повлече поддршката за претседателот и го поддржа импичментот како „единствениот начин за одбрана на демократијата“, повикувајќи ги пратениците да гласаат според нивната совест. Илјадници демонстранти пред гласањето се собраа денеска во Сеул, повикувајќи го Јун да поднесе оставка.
