Во целост ги негирав овие наводи и не само скопјани, туку и цела Македонија знае дека луѓето коишто ги продадоа македонските национални интереси сега два дена пред изборите излегоа со наводи кои јас низ брза постапка не можам да ги докажам и тоа го прават, бидејќи јас не бев ниту човекот, ниту жената која што ги тераше да дадат изјава дека доколку го изгубат Скопје ќе ги изгубат своите политички кариери и своите функции, вели независната кандидатка за градоначалничка на Скопје Данела Арсовска за обвинувањата од СДСМ дека има бугарско државјанство.
– Скопјани и Македонија немаат кратко памтење и знаат кои се тие што ги продадоа македонските национални интереси. Ова е уште еден чекор на демонстрирање на нечија слабост. Безумно лажат за да си ги спасат своите кариери и функциите – рече Арсовска.
Таа додадае дека ако во минатото направила нешто погрешно немаше сега да се кандидира во трка каде што ќе ја напаѓаат, како што вели, вакви безобразни луѓе кои лажат континуирано и истата мисла не можат да си ја задржат два дена откако ќе ја кажат.
-Скопјани, ве молам, ако сакате човечност, поддржете човек за Град Скопје, оти јас имам двајца непријатели, овој којшто не направи ништо за Скопје, а од друга страна имам нов непријател кој денеска се појави и сака да каже дека има антидржавен елемент во мене. Извинете, но вие ги продадовте македонските национални интертеси. Јас сум Данела Арсовска претседател на Сојузот на стопански комори на Македонија и своето име не го продадов. Не ги терав јас да кажат дека ќе дадат оставка и дека ќе ја напуштат Владата ако го изгубат Скопје. А ќе го изгубат Скопје оти јас сум подобар човек – рече Арсовска.
Арсовска најави дека ќе ги преземе сите мерки за да се заштити од како што рече, лажомани и дека ќе се консултира со најдобри правни експерти.
На барањето на премиерот Зоран Заев да ја повлече кандидатурата поради бугарското државјанство, Арсовска одговори:
– Заев ќе направи се за да си ја спаси политичката кариера. Тој треба прво да го повлече Шилегов оти ништо не испорача. Сега бараат од мене да се повлечам? Кога дојде до таму премиер да се плаши од жена, нека си размисли убаво и по понеделник нека си ја поднесе оставката. Скопјанка сум, Македонка, тука живеам 42 години. Не се повлекувам. И планирам се да докажам од прво до последно, истакна Арсовска.
