Две лица загинаа во пукање во ноќен клуб во норвешката престолнина Осло, соопшти полицијата рано утринава.
Полицијата на Твитер објави дека неколку лица се повредени, а осомничениот бил приведен набргу по пукањето во близина на местото на настанот.
Сите индиции се дека сторителот дејствувал сам, изјави портпаролот на полицијата Торе Барстад подоцна за „НРK“. Три лица се тешко повредени, а на 19 им била укажана лекарска помош.
„НРК“ објави дека има најмалку три места на злосторство. Нема информации за потенцијалниот мотив, но инцидентот првично не беше класифициран како терористички. Полицијата не даде информации за возраста или идентитетот на уапсениот осомничен.
Осомничениот не дал никакви изјави. Полицијата го пребарала неговиот стан и запленети се две парчиња огнено оружје употребени во нападот, јавува „НРК“, повикувајќи се на „Барстад“.
Репортер кој бил сведок на нападот рекол дека видел човек кој дошол на местото на настанот со торба, извадил пиштол и почнал да пука. Друг сведок од ноќниот клуб изјавил дека настанала паника.
Нападот се случил во ноќниот клуб London Pub, геј клуб на популарна улица во Осло, објави Aftenposten.
На полицијата и помогнале цивили да го уапсат осомничениот, пишува весникот, повикувајќи се на полицијата.
Полицијата истражува дали инцидентот ќе има влијание врз парадата на гордоста во Осло, која треба да се одржи во сабота.
