Четворицата членови од доброволното противпожарно друштво од Чаир „Бајрам Мифтари“ од Скопје вечерва успеаа да пронајдат и спасат жена под урнатините на зграда во турскиот град Адијаман.
Од информациите на терен спасувачите ја пронашле жената длабоко под бетонски столбови и таа е единствената преживеана во зградата каде се претпоставува дека има најмалку 60 жртви. Жената има 38 години и успеала да преживее 118 часа под урнатините.
- Копајќи под урнатините слушнавме како женски глас бара помош. Вознемирени и возбудени продолживме со копањето и успеавме да ја извадиме жената. Таа има само мали повреди и ќе биде добро. За жал целото нејзино семејство загина, – велат за Досие спасувачите.
Пожарникарите се пресреќни бидејќи успеаа да дојдат до неа. Цел ден го расчистуваа теренот и вадеа мртви тела. Велат дека телата биле како на куп бидејќи зградата се урнала вертикално.
