Претседателот на Судскиот совет Киро Здравев соопшти дека со буџетот за 2021 успеале да обезбедат 90 милиони денари за набавка на сервери.
Здравев вели дека е потребна целосна дигитализација на судовите, не само за онлајн судењата, туку и за единство во примената на законите.
„Ние не сме спремни и дигитализирани сите судови да одговорат на онлајн судење. Потребна ни е опрема за да може судовите да ја реализираат оваа обврска“, изјавил Здравев за ТВ 24.
Тој смета дека засега онлајн судење е потешко да се организира за граѓанските предмети.
„Во кривичните е полесно ако обвинетиот се согласи. Досега имаме такви во судот во Кавадарци, а во другите немам сознанија, но факт е дека како императив се наметнува потребата ова искуство од пандемијата понатаму да ни послужи да се предвидат правила во процесните закони заради онлајн судење“, рече Здравев.
