Билборди со слоганот „Дали знаеш од каде доаѓа твојата ‘роба’?“ деновиве се појавија на повеќе локации низ Србија. На нив се прикажани задник, чорапи, долен веш, укажувајќи на нехигиенските услови на шверцување дрога.
Станува збор за кампања на „Егзит“ за претстојното издание на фестивалот. Оттаму повикуваат да не се користат разни наркотични средства на годинешното издание што ќе се одржи на Петроварадинската тврдина во Нови Сад од 4 до 7 јули.
Под хаштагот #StayClean, организаторите на фестивалот деновиве споделуваат едукативни содржини во врска со опасностите од наркотиците. Целта е да делува превентивно, особено за оние кои допрва треба да почнат да трошат наркотици, како и да ги спречат оние кои веќе почнале да користат.
Кампањата нуди корисни и лесно разбирливи информации за разни наркотици и нивното влијание врз менталното и физичкото здравје, како и други содржини кои вклучуваат видеоигри кои покажуваат кои делови од човечкото тело се користат за транспорт на наркотици на многу нехигиенски начин.
„Ова е директен начин за Егзит да разговара со секого, особено со младите, без да ги брка од оваа важна општествена тема, но со интерес да бидат подобро информирани“, се вели во описот на кампањата.
