Сирени и експлозии се слушнаа денеска во западното предградие на Ерусалим поради палестински ракетни напади додека Израел продолжува со бомбардирањето во Појасот Газа. Околу 30 Палестинци, од кои најмалку една третина цивили, и двајца високи команданти на милитантната група Исламски џихад се убиени во бранот борби за време на викендот, додека ракетните салва испратија десетици илјади Израелци во засолништа. Министерството за здравство на Газа соопшти дека досега се убиени 24 лица во крајбрежниот појас, меѓу кои и шест деца.
Утре Советот за безбедност на ОН треба да се состане на вонредна седница во врска со ескалацијата на конфликтот во Појасот Газа.
– Советот за безбедност на ОН утре ќе се состане за да разговара за актуелната ситуација во Појасот Газа – изјави неименуван извор и наведе дека иницијативата ситуацијата во Појасот Газа да се стави на дневен ред на вонредната седница дошла од Обединетите Арапски Емирати (ОАЕ), Кина, Франција, Ирска и Норвешка.
Прес-службата на израелската армија соопшти дека во рамките на операцијата со кодно име „Зора“ се започнати офанзивни акции против цели поврзани со групата Исламски џихад во Појасот Газа.
Според проценките на израелската армија, во првата серија воздушни напади биле елиминирани „околу 15 екстремисти“, меѓу кои и командантот на бригадата Ал Кудс (бригада во Ерусалим), која е вооружено крило на палестинскиот исламски џихад.
За време на втората фаза од специјалната операција на израелската армија беа погодени шест воени цели на Исламскиот џихад, вклучително и некои батерии за ракетни фрлачи распоредени во Појасот Газа.
Бројот на загинати во израелските напади врз Појасот Газа се искачи на 24, додека 203 лица се повредени, објави синоќа каналот Sky News Arabia, повикувајќи се на Министерството за здравство на Газа.
