Авион од типот „канадер“ се урна на грчкиот остров Евија додека учествуваше во гаснењето на пожарот во близина на Каристос.
Загинаа капетанот на ескадрилата Христос Мулас (34) и копилотот, втор поручник Периклис Стефанидис (27).
Овие херои, како што пишуваат грчките медиуми, рано утрово влегле во авионот и почнале да се борат со огнената стихија, која со денови ја има зафатено Грција.
Додека гаснеле пожар кај селото Платанистос во Каристос, авионот им се урнал при маневар и загинале на должност.
Според грчките медиуми Стефанидис и Мулас полетале нешто пред 12 часот со „CL-215“ од аеродромот Агиалос на пат кон Каристос.
Малку по 15:00 часот, откако испуштиле вода на жариштето, нивниот авион со десното крило удрил во дрво, што довело до губење на висината и авионот се урнал во следниот момент.
Неколку секунди откако канадерот паднал покрај потокот, авионот експлодирал.
Двајцата млади пилоти, според медиумите загинаа и покрај напорите на пожарникарите да го изгаснат огнот и да ги извлечат.