Данскиот репрезентативец Кристијан Ериксен ја напушти болницата и реши да ги посети своите соиграчи во таборот на данската репрезентација.
Ериксен колабираше минатата сабота за време на мечот Данска – Финска. Неговото срце престана да чука за момент, па лекарите го оживеаја по неколку минути. Сега е успешно опериран, инсталиран е дефибрилатор и големото прашање е дали и кога повторно ќе игра фудбал.
“Откако Кристијан беше подложен на разни кардиолошки прегледи, беше одлучено дека треба да има инсталирано МКБ (кардиовертер дефибрилатор). Овој уред е неопходен по срцев удар, бидејќи може да доведе до аритмии”, објави Данската фудбалска федерација.
Сосема неочекувано, Ериксен се појави на тренингот на данската репрезентација, а тоа ги изненади сите негови соиграчи. Тој беше таму со неговата сопруга и неговите две деца.
“Не знаев дека доаѓа. Само што пристигна, престанавме да тренираме. Изгледаше како да е добро расположен и тоа му даде на целиот тим позитивна енергија. Можевме да го прегрнеме, убаво беше да го видиме со неговиот син. Тоа беше многу добар ден, ни требаше тоа “, рече данскиот играч за врска Кристијан Норгард.
Дефанзивецот Јоаким Маехле исто така беше среќен за доаѓањето на Ериксен.
“Тоа беше емотивен момент. Особено кога се сеќавате кога последен пат сте го виделе кога го оживеаја на теренот. Знаевме дека Кристијан е добро, но да го видовме во живо е сосема поинакво чувство”, рече Мехле.
Сè уште не е познато каква иднина го чека Кристијан Ериксен и дали воопшто ќе може да се врати на натпреварите. Според италијанските медиуми, сомнителни се и неговите настапи во Серија А. Според италијанскиот закон, луѓето со вграден дефибрилатор не можат професионално да спортуваат. „Ла Газета дело Спорт“ додава дека од таа причина на играчот можеби нема да му биде дозволено да ја продолжи кариерата во Интер, чиј член е сега.
Данската репрезентација се подготвува за последниот натпревар за Евро 2020, кој се игра против Русија. Веќе е познато дека избраниците на Каспер Хилмуд немаат шанса да се пласираат во следната фаза на турнирот, иако, гледајќи ги последните настани во тимот, ова не им е најважно. Сепак, тоа не значи дека Данците ќе бидат без мотиви на прошталниот натпревар.
Натпреварот меѓу Русија и Данска се игра во понеделник, а во чест на Ериксен, данските фудбалери сигурно сакаат да остварат победа.
Неодамна, Ериксен беше почестен на натпреварот Данска – Белгија. Во 10-та минута дуелот беше накратко прекинат, за сите да го поздрават Ериксен и да му посакаат успешно закрепнување.
