Рускиот претседател Владимир Путин наводно на германскиот канцелар Олаф Шолц му кажал дека масовните напади на Русија врз енергетската инфраструктура на Украина се „неопходни и неизбежни“, додека Шолц побарал од Путин да ги повлече своите војници од Украина за да се постигне „дипломатско решение“. Како што соопшти вчера Кремљ, во разговорот што Путин го имал со Шолц, рускиот претседател ја осудил „деструктивната“ позиција на Западот, кој го поддржува Киев, пренесува Франс прес.
„Беше истакнато дека руските вооружени сили долго време избегнуваа високопрецизни ракетни напади врз одредени цели во Украина, но таквите мерки станаа неопходни и неизбежни во услови на провокативни напади од Киев“, се вели во соопштението на Кремљ.
„Приземјувањето на Украина со оружје е деструктивна политика“, рече рускиот лидер во разговор со Шолц, пренесува Тасс.
Тој додаде дека истото може да се каже и за фактот дека западните земји, вклучително и Германија, обучуваат украински војници. Според Путин, поради сето ова, како и големата финансиска поддршка за Украина, режимот во Киев ја отфрла самата идеја за реговори.
Советникот на украинскиот претседател Михаил Подољак во една од ретките соопштенија на украински функционер за бројот на жртви, рече дека од почетокот на војната во таа земја загинале меѓу 10.000 и 13.000 војници, пренесува Танјуг. Генералниот секретар на НАТО Јенс Столтенберг изјави дека Северноатлантската алијанса нема да биде вовлечена во војната на Путин.
„Како што зимата се интензивира, Русија ја бомбардира енергетската инфраструктура на Украина. Тие се обидуваат да ги замрзнат и изгладнуваат Украинците. Путин ја користи зимата како оружје. Не смееме да дозволиме да победи, а НАТО нема да биде дел од конфликтот. Нема да бидеме вовлечени во војната на Путин“, рече Столтенберг, според веб-страницата на НАТО.
Турскиот министер за надворешни работи Мевлут Чавушоглу изјави дека до пролет очекува јасна слика за војната во Украина.
„Сега Украина напредува на терен, враќајќи дел од своите окупирани територии. Но, Русија за возврат намерно гаѓа цивилна инфраструктура. Затоа, животот станува тежок, особено за Украинците и за сите нас“, рече Чавушоглу, пренесе Ројтерс.
Тој посочи дека верува оти пред пролет ќе имаме јасна слика за прекин на огнот, примирје или преговарачка маса.
