Високиот комесар за надворешна политика и безбедност на ЕУ, Жозеп Борел рече дека Израел „го користи гладот како оружје за војна“ и ја обвини земјата за блокирање на копнените патишта кои се најдобриот начин за испорака на храна за стотици илјади Палестинци кои се соочуваат со глад во Газа.
Борел синоќа пред Советот за безбедност на ОН изјави дека хуманитарната помош мора да се достави во Газа, каде што кризата е создадена од човечки фактор и нема природни катастрофи, поплави или земјотреси.
„Тоа е вештачка криза и кога бараме алтернативни начини да обезбедиме поддршка по море или воздух, мораме да го направиме тоа бидејќи природните патишта за поддршка се затворени, всушност вештачки затворени и гладот се користи како продолжена рака на војната. “, рече Борел.
Тој рече дека таквата практика е осудена во Украина и дека истите зборови мора да се користат и во Газа.
Светската програма за храна вчера испорача храна во северниот дел на Газа за првпат од 20 февруари, објавија Обединетите нации.
По проверка на израелскиот граничен премин Керем Шалом, шест камиони со хуманитарна помош влегоа во Газа.
Хуманитарните организации со месеци се борат да достават помош во изолираното подрачје, иако некои приватни конвои успеаја да достават храна.
