Руската армија започна масовен напад врз Украина со големи роеви беспилотни летала, што наиде на големо незадоволство и на американскиот претседател Доналд Трамп, кој изјави дека рускиот претседател станал „целосно луд“.
„Не сум задоволен од она што го прави Путин. Тој убива многу луѓе“, им изјави Трамп на новинарите во Њу Џерси непосредно пред да се качи на претседателскиот авион Ер форс за да се врати во Белата куќа од неговиот голф клуб во Бедминстер. „Не знам што по ѓаволите му се случи на Путин. Го познавам многу долго време. Отсекогаш добро се согласувам со него. Но, сега тој пука со проектили во градовите и убива луѓе, а тоа воопшто не ми се допаѓа. Ние сме среде преговори, а тој истрелува проектили кон Киев и други градови“, додаде тој. На прашањето дали ќе размисли за дополнителни санкции против Русија, Трамп одговори: „Апсолутно“.
Путин „апсолутно полуде“, напиша американскиот претседател на својата платформа Truth Social по неговото пристигнување во Вашингтон. „Без никаква причина се испалуваат ракети и беспилотни летала напаѓаат врз градовите во Украина.”
Трамп додаде дека отсекогаш сметал дека Путин ја сака цела Украина, а не само парче од неа. Можеби Путин е во право, „но ако го направи тоа, тоа ќе доведе до пад на Русија!“
Но, Путин не беше единствениот против кого што Трамп упати сериозни обвинувања. Тој исто така остро го критикуваше украинскиот претседател Володимир Зеленски дека не ѝ прави услуга на својата земја со тоа што го зборува како што постапува. „Сè што ќе излезе од неговата уста предизвикува проблеми, не ми се допаѓа и подобро да престане“, напиша Трамп. Ова е војна што никогаш немаше да започне доколку тој беше претседател, додаде Трамп. „Ова е војна на Зеленски, Путин и (Џо) Бајден, а не на Трамп“. Трамп тврди дека само помага „да се изгаснат големите и грди пожари предизвикани од груба неспособност и омраза“.
Трамп сака да постигне прекин на борбите, но критичарите го обвинуваат дека не врши доволен притисок врз Русија. Првите директни разговори меѓу Русија и Украина завршија без договори за прекин на огнот. Сепак, двете страни се согласија да разменат по 1.000 затвореници, што се случи во текот на викендот.
Специјалниот претставник на САД за Украина, Кит Келог, исто така, ги осуди обновените тешки напади и повика на итен прекин на огнот. Германскиот министер за надворешни работи Јохан Вадефул пак најави „јасна реакција од Западот“ и подготовка на нови санкции.
Руските вооружени сили масовно ја бомбардираа Украина со ракети, крстосувачки ракети и стотици беспилотни летала во ноќните часови во саботата и неделата. Над десет луѓе загинаа, а десетици се повредени во најтешките напади во последните неколку месеци. Украинскиот претседател Зеленски ја обвини Русија за тероризам и го повика Западот да изврши поголем притисок врз Москва.
Украина, од своја страна, постојано испраќаше напаѓачки беспилотни летала кон Москва во текот на неделата. Некои аеродроми во руската престолнина поради тоа мораа привремено да ги прекинат полетувањата и слетувањата.
И ноќеска Украина беше повторно нападната. Според украинските воздухопловни сили, руски беспилотни летала го нападнале пристанишниот град Одеса од Црното Море. Серија силни експлозии се слушнале и во источниот град Харков, изјави регионалниот воен администратор Олех Синјехубов на Телеграм. Со напади со големи групи беспилотни летала, руската војска се обидува да ја преоптовари украинската противвоздушна одбрана.
